احبتي في منتدى كوورة تونسية السلام عليكم
آش كون منا ما طيبش شكشوكة و الا ما يعرفش الشكشوكة ...و حال الكورة في تونس ما لقيتش خير من هذه الاكلة باش نعبر عليه...
الموضوع نقدي متع تفرهيد و الغش لا ....
**************
يا سيدي كنا نتجولو في مرسيليا وجعنا و اتوحشنا ريحت البلاد برة قلنا نمشيو نفطرو في مطعم تونسي على الاقل نتذكرو تونسنا الغالية راهي الاكلة التونسية الاولى عربياو هي الاحسن على الاطلاق...
دخلنا و قعدنا هكاكة جانا السرفور متع المطعم ايا رحب بينا و من بعد مدلنا menu :
ـ شكشوكة شعبية
ـ شكشوكة بنزرتية
ـ شكشوكة ساحلية
ـ شكشوكة قابسية
ـ شكشوكة صفاقسية
ـ شكشوكة مكشخة بالمرقاز
ـ شكشوكة حلوة باجية
ـ شكشوكة بالبقلاوة
ـ شكشوكة قفصية
ـ شكشوكة جندوبية
ـ شكشوكة بوقرنين
ـ شكشوكة مرساوية
ـ شكشوكة مستيرية
شكشوكة العكارة
غزرنا لبعضنا و قلنا يا رسول الله لا صحين كسكسي لا وحيد حوت لا وحيد مقرونة كلها شكشوكة...على بعضها...ايا بدينا نختارو و اتفاهمنا كل واحد ياخو نوع من هذه الشكشوكة...
غزر صاحبي و قال بالله عيش خويا اعطيني وحيد شكشوكة بنزرتية و الاخر قال انا نحبها شعبية و الثالث ساحلية و الرابع طلع قفصي و اكمندا على وحيدة شكشوكة قفصية ...
لحظة من زمان و السرفار جايب الطبق الاول هاي سيدي وحيدة بنزرتية... حطلي الصحن قدامي قعدت انقلب فيها لقيتها طايبة بالمخ...عجب شكشوكة بالمخ انا في العادة نعرف عجة بالمخ....و أش بيها ما فيها كان المخ و طرف هريسة و ريحتها قوية شوية ...
عيط للسرفارو قتلو: راهي فيها شوية ريحة ...جاوبني و قال هذيكة ريحت المخ وزيد الطباخ القروي شيطتها شوية
خلاها برشة تتقلى مع بلقاسم .....و زيد باع السلعة الكل و كان يلقى ايبيع المرميطة اللي ايطيب فيها...اما كول توة تشوف في الاخر باش تحلى ...الشكشوكة البنزرتية كيف التاي بنتها في الرشفة الاخيرة..و الله فمة جماعة ايخيروها على الكروفات راهي بالمخ يا حبيبي ....
ايا قعدت ناكل في شكشوكتي الجوع يعمل...
احنا هكاكة و الشكشوكة الثانية حضرت...شكشوكة شعبية سخونة لصاحبي اللي بحذايا ...حطهالو السرفار و مشى ...وقعدت نغزر لصاحبي باهت في الشكشوكة...
من الاول ما عطيتش اهمية للموضوع....هكاكة انا ناكل و صاحبي ديمة عينيه محلولة ...باهت في الانتاج قربتلو و عملت عليه طلة ....
ت آشبيك باهت عمرك ما ريت شكشوكة ؟؟؟
قالي لا ريت اما شكشوكة خضراء ما ريتش؟
خضراء؟؟؟...بالرسمي و الله خضراء؟؟؟
يا سرفار يا سيد ...يل خويا ...جاء يجري المسكين و قالو صاحبي اش بيها خضراء...
آه على اللون ...تهاذاكا الطباخ حب يتفلسف قص عليها كعبة فقوس ...تكانت تعمل الكيف الناس الكل عاملا عليها جو من البنة متاعها...يا خي فزدها.... كيف جاه الشاف قالو علاه تقص في الفقوس على الشكوشوكة ؟؟؟؟ من الاول صك قال ما عملتش و ما قصيتش..اما من بعد كيف را الحفصي جاء قال سامحوني... ياخي صكو بست جمعات يخدم و ما يخلصش....كول ...كول ...في الاخر توة تشبع و ربما تقولي زيدني صحن اخر ...
و من بعد دخل السرفوريزرب جاب الشكشوكة الساحلية هو دوب ما حطها قدام صاحبي اللي طلبها و هو نقز على طرف الخبزو غطس في الصحن ذاق منها و ديراكت قال شبيها اميصا ما هاش عاقدة كيف العادة ...راهي مشهورة حتى في افريقيا ...و اللي يذوق يتضرب ايجي ينعس...شبيها هكة المدة الاخيرة ....شبيها مرخوفة
نطق الطباخ و قال زدناها شوية مايوناز يا خي بالسخانة اتحلت و ميصت...اما كول على جنب و خليها تبرد شوية توة تعاود تعقد...و تتكبس...و زيد في الطبخة لخرانية جات ناقصة برشة افاح ...توة انرجعولها افاحاتها وتشوف البنة و المطعم ....
احنا هكاكة ما زلنا لاهيين في الشكشوكة الساحلية ....و اللي كلا من الشكشوكة القفصية قام ايصيح ...يا ميمتي ما حرها جيبولي دبوزة ماء فيها كيلو هريسة...
غزرنالو و قلنالوراهو كلا منها القول متع قفصة و ما جرالو شئ...لا و الله... ولي تبارك الله عليه ايبرطع تبرطيع حتى البيلنتي تلوح عليها و شدها...ما فلت شئ...
اما ان شاء الله يقعد محرر...في الماتشات الجاية و ما ياكلش وحيدة شكشوكة بالطماطم كذابة ...وتمساط البيعة الكل...
الحلقة الثانية ....قريبا
موضوع: شكشوكة تونسية ...كول بالشفاء..... الحلقة الاولى 
الجمعة مايو 09, 2008 3:33 am